كلمات اغنية الأب الجوكر 2021

لحظة ما اتولدت وشالك بين إيديه

واتأملك بعينه وقف العالم حواليه

أول صورة بريئة ليه شافها فيك

إيد الضلمة اللي في عالمنا لسه ما اتمدتش ليك

وبدأت تكبر وحبه ليك بيكبر

يوم عن يوم حاجة منه فيك بتظهر

إنت عنده أولى منه لأنه

عايزك تكون أحسن من كل الناس ومنه

وإنت من صغرك وشقاوة الدنيا فيكي

يبص لماما تلفي وشه ليكي

وتيجي لو زهقانة عشان مافيش أطفال في سنك

تقولي إلعب معايا يقلب طفل أكثر منك

أول يوم حضانة مسكتي فيه سابك بصعوبة

لأنه كان مرعوب أكثر ما كنت إنت مرعوبة

لدرجة إنه كان هيرجع ياخذك لولا مامتك

معاكي بيحسبها بقلبه دايما مش بالمنطق

وإنت اتأثرت في إعدادية بكم واحد زميلك

فطلبت منه يسيبك عيب يوصلك ويجيبك

قدَّر حكم السن واداك الحرية

راقبك عشان يطمن إنك قد المسؤلية

ما كانش غاوي يقول لك ذاكر كل شوية

كان عايزك ترتاح كل السنين الجاية

مع ذلك لما زعلت على كلية ما جبتهاش

حضنك وقال لك يا إبني العالم ما انتهاش

كبرت واتغيرت وخذت منه ركن بعيد

بقى بينكم سور وكل يوم يزيد

لا عدت قادر تسمع منه ولا من باب الود

لا عاد هزاره بيضحك ولا حكاياته تشد

لكن دي مش مشكلته ده سنه ودي تجربته

عشان يفضل مصاحبك عمل كل اللي في مقدرته

وصلت إنه يركز أما شباب تهزر جنبه

عشان يفتح معاك كلام بشكل تبقى حابه

مع أول عريس حس بقبولك ليه

إتخض كإنه فاكر إن اليوم ده لسه بعيد

حس البيت هيفضى لا الحياة هتفضى

لسه شايفك طفلة كان عايزاها تفضل

غار فاتحجج واتشرط واتلكك

وفك لما إتأكد انك حبتيه وحبك

عايز مصلحتك حتى لو مش ده المتشاف

ما حدش خاف عليكي قد ما هو خاف

فاضل على يوم جوازك شهر أو أقل

لسه نص جهازك والقرض آخر حل

كمل بيه اللي ناقص مافيش حاجة استكترها

قال لك نطمن عليكي بس وهندبرها

والدنيا خدتك

بعد الجواز كثرت مشاغلك

كل فين وفين بتفضي تزوري أهلك

وهو بدل ما يقول لك ليه ما بتسأليش

يقول لك لو احتاجتي حاجة قولي ما تتكسفيش

وإنت الظروف اضطرتك تسافر

ما كانتش ماشية معاك هناك لكن بتعافر

مامتك توفت وهو بطوله صبر

ولما رجعت بعد سنين لاقيته كبر

كبر بجد بقى بينسى ومحتاج لحد

يفكره بعلاج السكر والشريان اللي اتسد

لاقاك حزين عليه وندمان لإنك سبته

ضحك وقال لك شُفت أبوك احلو إزاي في شيبته