كلمات اغنية المحيط الفرعي 2014

كل يوم الأزمة عم تتفاقم وجوه عابسة

حكيت عن الأرض كتير زهقت من اليابسة

مش طايق الحيوان الناطق بدي أعيش تحت المية

ضغط عالي مش قادرين نتنفس طلعت هيه هيه

وصلتني لعند منخاري وخلتني بدي أعطس

ثدييات ع بعض بتتغطرس خلص قررت أغطس

لتحت تحت أنا هيك ارتحت

مافي سده واستريح ولا في من الهوا إلتفحت

ودعت العالم المريض عمي فش بعد المحيط

لا فيه نظام عبيط ولا شرطة وشلاليط

هون باختيارك بتبيض وبتضلك على البيت

مش مين صار إله صيت و مين نزل شريط

العيب الوحيد إني كان لازم أتعالج قبل ما أروح

غصت في عمق العمق و أنا لسه مجروح

لازم ادير بالي القرش بيلحق ريحة الدم

زي ما قانون الضرايب بيلحق ريحة الهم

بالليل مخلوقات هلامية بتضوي قناديل

نادي ليلي ونجم البحر بروح فيك مواويل

قلتلهم إني بعزف إيقاع قالولي يلا فوت

بس استحيت لما سلموا الطبلة للأخطبوط

وعفكرة السردين جماعة مرتبين وزوء

هاي الزناخة تعلموها منا لما طلعوا عنا فوق

ذكر فرس البحر بطنه منفوخ ماله

حامل بالشهر التاسع عنجد بتستحيش ع حاله

بس برضو ماله على الأقل فاهم المساواة

لو اعرف خطيبتك عليه بدقيقة بتنساك

حتموت فوق وإنت بطالب بحقوق وحرية

هون وضعي تحت الريح وصاحبت حورية

على اليابسة و الوضع ضاق و العمل الشاق

باعونا مين؟ باعونا الأشقاء

خسرنا مين؟ خسرنا الأصدقاء

و انحجبت الآفاق فرع المداخل في الأعماق

على اليابسة و الوضع ضاق و العمل الشاق

باعونا مين؟ باعونا الأشقاء

خسرنا مين؟ خسرنا الأصدقاء

و انحجبت الآفاق فرع المداخل في الأعماق

أنساك من الهامور ولقس واللي بتشوفه بالسوق

هون حتى الحيوان البرمائي بيعتبروا مدسوس

يخوفي يكون تأثر بأسلوب النوع تاعنا

السمك الصغير قلي كلب البحر كلب لأنه باعنا

هون ثروة ومرجان يامان و يوزعوا الفايض

في صلة رحم بباركوا للي بايض

ماحدش فيك بغلط كل أخبارنا وصلت

سلطعون على الشط بفلت برجع معاه الجرايد

شبكة معلومات و منتديات للثدييات

بتعيش هون أحلى حياة رخاء سفنج و قشريات

بتلم كل اوساخ البحر بكل أمانه

ولو العاصمة بتستاهل كنت شغلتهم بالأمانة

تحت الكل مزلط بس ما في حدى فاجر

الكبير كبير و الحوت مش تاجر

الكل بينسى بسرعة بس مش لأنه مش سائل

لأنه مش حقود عايش على قروض و متجاهل

سمك أبو سيف بقوم بواجب الضيف

والدلفين أذكى حيوان سميه أبو العريف

إذا بتسأله بدلك أو بقولك إنو بيعرفش

مش زينا منتوه الوافدين بفصل الصيف

بدي أنوه على نوعي و أعمم أعمم

إذا برجع بطلع فوق دمي رح يتسمم

لأنه تعالينا على سنة الكون وضع مش طبيعي

تع شوف بالقاع قوم لوط صاروا غاز طبيعي

طمع جشع فجع توسع ما قنع

جاع ما باع إنصاع تمرد إنمنع

وصلنا حالنا لهذا الوضع بإيدينا

فيا مننعدل يا بينقلب البحر علينا

على اليابسة و الوضع ضاق و العمل الشاق

باعونا مين؟ باعونا الأشقاء

خسرنا مين؟ خسرنا الأصدقاء

و انحجبت الآفاق فرع المداخل في الأعماق

على اليابسة و الوضع ضاق و العمل الشاق

باعونا مين؟ باعونا الأشقاء

خسرنا مين؟ خسرنا الأصدقاء

و انحجبت الآفاق فرع المداخل في الأعماق