كلمات اغنية حاجة جديدة بدر العزي 2024

تدري اني ما قدرت أنساك بالمرّه مع انّي

كل يوم أحاول أشغل نفسي بحاجه جديده

لكن النسيان شي أكبر من عزومي ومنّي

يا شريط بذاكره راسي وراسي يستعيده

ويش أقول ووش تقول ليا سألوا عنّك وعنّي

مابقالي لأجل أجاوبهم ولا جمله مفيده

أتمنى رجعتك ولا معاي إلا التمنّي

والتمنّي للفقير اللي جَلَس على الحديده

أبتسم لا مرّ طاريّك على بالي وأغني

إبتسامة طفل جنب أمه يصلي صبح عيده

أنت ياللي منّك دموعي ومنّك ضحك سنّي

ماقدرت أذوق بعدك طعم الأيام السعيده

في وجودك يختلف وياي حتى طعم بُنّي

في يديك الملح والسكّر تنقّصه وتزيده

يوم حاولت أمسكك بيدي فشلت وخاب ظنّي

آدمي والآدمي ماهو بماخذ شي بيده

كل هذا ماهو بمعناه مابيك امتهنّي

دايم أدعي لك لو يديني عن يدينك بعيده

حبي أكبر من طمع نفسي بدنيا في تدنّي

الطمع ما زوّد ابنادم ولا نقّص رصيده

ولا أنا ساكن بريدك بعد ما حبك سكنّي

كل يوم أخط صفحه يا رساله يا قصيده

مابقالي من حبيبي شي يرضيني لكنّي

بتشرّف وأعتبر نفسي رساله في بريده

وانت حاول ما تواخذني على إزعاجي لانّي

كلما قفّلت موضوعك رجع قلبي يعيده

إعرف اني متتّ فيك ليا دفنّي من دفنّي

والحقيقه يفعل الله ما يشاء وما يريده