كلمات اغنية امهليني بدر بنيدر 2019

دمعتك يا حبيبة شاعرك مايليها

غير حزنً طويل وسحمةً مشلّهبّه

فاقدً ضحكتك يام الجمال أضحكيها

دق قلبي عليها مثل دق المنبّه

ليش اورّي جروحي عالمً ماتبيها

ما تقدّر هموم الساهرين المسبّه

ارتكت لي على المعلاق تبّت يديها

تبّةً ... ما بعدها طول الأيام تبّه

جرحك اللي براني بريةً ما عليها

مايفيده علاج الصيدلاني وطبّه

راحته فالدروب اللي عشانك اجيها

بين قاطع اشاره .. ومتهبّد مطبّه

أمهليني على الغلطة عشان أحتويها

والله اني لا اعدلها معك بالمحبّه

والقطاعة على شان الوصال اقطعيها

ناوليني طرف خشمك على شان أحبّه

والجدايل ليا طاحت عيوني عليها

أنثر العود الأزرق من تحتها وأشبّه

والقلايد من ارقاب البنات اسريقيها

اشتروها عشان رقبتك المشرئبة

وخيزارانة قوامك للهوى مايليها

واستحّلي من التقدير قشره ولبّه

الله الله مع اللي شوفتك يرتجيها

من يشوف المحبّة غايةٍ مستحبّه

حاجةً من ثلاث ايام منك احتريها

هاتفي تعرفين سنابه و واتس أبّه

ارسلي لي رسالة فاضية وأحذفيها

وأعتبرها سلامً من زعول .. ومحبّه

نفسك اللي تعابير السخط تعتريها

خلّي اوضاعها .. واوضاعنا مستتبّه

مايسمّ الكبود ويدبل السمّ فيها

غير دمعً من الحور الوسيعة مصبّه