كلمات اغنية ابي اتونس سلطان بن معيض 2021

من نادر الأفكار ودي بـ بيتين

بيتين هاجوس المشاعر قصدها

واذا استوَت ثم زوّد الحرف حرفين

من الحروف النادرات اعتمدها

أبيات تكفي عن كثير الدواوين

أنقش معانيها و أشيّد عمدها

و يانار لجل الكيف ودي تشبّين

الكيف هو طِبّ الكبود و ضمدها

في دلةٍ فيها للأشقر براهين

و الهيل و المسمار فاح بوقَدْها

بريةٍ ندفع عليها المثامين

تبري عماس الراس للي وجدها

خلوني آخذ راحتي و أشبِع العين

من لذة الدنيا و غاية سعدها

ابى اتونس دامنا اليوم حيّين

اطوي حزوم الارض و أطوي جلدها

ابغى ابتعد عن جو ناسٍ كثيرين

اللي كثير إزعاجها في بلدها

اذا حجزنا التذكره و العناوين

تستاسع صدورٍ كثيرٍ جهَدها

ان كانهم نادو للإقلاع هلحين

والطايره على المدرّج وحَدْها

مشوارنا يبدأ على أم الجناحين

اذا اعتلَت بالجو تسمع رعدها

من شافها يقول تروح نصفين

من سرعها رادارها ما رصدها

على يميني محزم العسر واللين

رجَال في مُـرّ السنين و شهدها

عبدالله ابن معيض نسل السلاطين

كم قمّةٍ لجل المراجل صعدها

اخوي راع الطيب والمذهب الزين

فيه المزايا ما حصينا عددها

كني أشوف ابوي ياحي هالعين

اللي فعول الطيب ثبّت وتدها

ويا حي ابو جاسر وريث الكريمين

يزرع فعول المرجله و ايحصدْها

عبدالله سالم من رجالٍ مهمين

الكايده دايم يحلحل عِقدْها

وفهد ابو سلطان سقم المعادين

مواقفه دايم تجي في وعدها

خوة نشاماً فالشدايد قويّين

على العلوم الغانمه معتقدها

و على محمد خير كل النبيين

صلاة ربي مستمرٍّ مددها