كلمات اغنية ربيع الشمال سلطان بن معيض 2021

ابدا بذكر الله الخالق وتشريعه

الباقي اللي يدوم وغيره الفاني

خلونا شرق الحصاه بخايعاً ريعه

العشب بمفرشه مختلف الالواني

يازين فاوه تونسنا طواليعه

تعاقب السيل يمه اول وثاني

نوار الاعشاب تجذبنا تناويعه

نوار الاسليح والشلوه وقحواني

غير النفل والبختري بمرابيعه

مع شيحة الخلفه مفرول وحوذاني

نبني به مثولثاً يزهي بترفيعه

مشرعاً للنشاما قاصي وداني

مركز منه للحماد تزهي مطاليعه

وللبه لعذفا لقيصومة فيحاني

فيها الربيع وزبيدياً مصاليعه

تبهج خواطر نشاماناً هل الشاني

اللي مناهلهم الجود وينابيعه

للضيفي والجار والشاره وللعاني

وتشريقِ للخفجي وجهة مطاليعه

على ابرق الكبريت وعلى ام الحيراني

وتغريب لعرعر ولطريف ومهازيعه

ومابين ابا القور وام اوعال ودياني

والاقرع والمعتدل هو ومجاضيعه

ومعيله وبدنه وادي المرا اشعاني

ومن المثولث على راف ومراتيعه

ومنه لحلمه ولكلاخ وللاحصاني

ومنهن على القين وميقوع ومشاريعه

ميقوع اللي من قبل يتعّب الساني

ياليت المنشد يشيل الشعر وايذيعه

المنشد العذبي والموهوب سلطاني

وحكر الفتى العذب سلطان ومراميعه

تجي مثل شوف عينه شوف الاعياني

يقول افخم عمل بانت تسانيعه

ايهيّض ويوسع الصدر عن الاشجاني

نتبع هوى البال والخاطر وتوسيعه

ببلادنا اللي مراتع خورنا وضاني

ننعم بها من فضل ربي وتسنيعه

ثماً بفضل العزم والحزم سلماني

له ولولي العهد نجدد البيعه

لهم ولانا وحب اخلاص واتفاني