كلمات اغنية ياموصي لاتوصي شبل الدواسر 2018

البَحَر والشّعر تربطهـم مواثيـق وزمالـة

من يردّ الموج والشاعر ليا هبـت هبوبه

يا بحر لو أكتب أبياتي على موجك رسالـة

بيت واحد من بيوتي يقلب أملاحك عذوبـة

يا بحر يا ليتني باقي على طيـش الجهالـة

يوم كنت صْغِير ما أواجه من الدنيا صعوبة

الفرح عنـده موظّفنـي ومعطينـي وكالـة

للضحوك وللمزوح ونزوة النفـس اللعوبـة

ويوم كمّل عمري العشرين قدّمْـت إستقالـة

الفرح عيّ أسلوبي لا يوافق مـع اسلوبـه

القوانيـن القديمـة والمذاهـب والأصالـة

تلزم الرجّال لوّ الحـال ماشـي دوب دوبـه

يا بَحَر والله ما شيّب رؤوسنا غير الرّجالـة

عيب نسكت وإن هَرَجْنا كلمة الرّجل مْحَسوبة

يا موصّي لا توصّي صاحبِك يلـزم ريالـه

وش يسوّي بالفلوس اللي تبرّت من جيوبـه

أنت وصّلْت النصيحة واتركه ما لك وما لـه

الكرم ما هو مجنَّب عنـه لـو إنّـه عقوبـة

كمّ مرّة جاه حملٍ مـا يطيقـه وارتكـى لـه

من عناده للحمول الجايرة مـا قـال توبـة

لو تسلّف واجب ضْيوفه من هْنـود البقالـة

مع صلاة الظهر في جدّة وفي عزّ الرطوبـة

لأجل ما يدرون ضيفانه بحالـه كيـف حالـه

ما يجيهم غير مستانس ويضحك مع جنوبـه

كرّم الله لحية اللـي ضيفـه يكـرّم سبالـه

وسوّد الله لحية اللي يعطي ضيوفه ذروبـه

البخيل تشوف وسم الضّيم حتّى في عيالـه

ما تقول إلاّ مشَلْوطهم على النـار الشّبوبـة

والكريم ليا عطى كأنّه ما يعطي مـن حلالـه

لو طلبته ثوبه اللي لابسـه يعطيـك ثوبـه

لعن أبو جدّ البخـل واللـي يحطّه رأسمالـه

البخيل بْخيل ما يعطيك حتّى مـن ذنوبـه

البخيل بْخيل ما يعطيك حتّى مـن ذنوبـه