كلمات اغنية بعد استهاض الهاجس صالح الزهيري 2019

بعد إستهاض الهاجس الي كنه ابليس اللعين

الى استطاش يضيق الديره علي برحابها

هبدت بنص الي على الطرقه ليا طالت عوين

وشبيت لي نارٍ حطبها من عمر شبابها

سريتها مسرى سباع الغاب وأسود العرين

مثلي ليا ضاقت عليه العاصمه ممسى بها

وجهت وجهي حادرٍ لاهو يسار إولا يمين

وغنيت لي عصماً يموت اللاش ماغنا بها

حكيتها حك الظروف الي تحك الطيبين

وطوعتها طوع العبيد الي تعبد أربابها

دينٍ علي يالقاف للعن والديه الوالدين

والي مايتعب للبيوت الشرد مايحضى بها

أحنها عن مدحت الهافين والمتصنعين

وللطيبين اسوقها مانيب أحسبْ حسابها

أسوقها سوق البدو للبل مهجرعت الحنين

وأعنها عّن المهار الي عراب أنسابها

إولاهيب تزهى الا طويل الباع مزبان الزبين

منصى صناديد الرجال الي ترف اشنابها

ستر الهنوف أم اللثام وشوق صافيةْ الجبين

في ساعةٍ يدرج رحى بقعا ويضرس نابها

فدون له قصار العمار وفدوه قصار اليدين

ويفداه منهو يقضي الحاجه ويزعجنا بها

هو ذخر نجران إوذخر يـامٍ كعام العايلين

مرخص ملايينه فدا نجران وإفدى ترابها

يعطي مايبغي الا ماعند الله ، رب العالمين

والى نشدنا من بعض الأشياء ماعلمنا بها

إولاهوب ذخر ليـام وبس ، الا وذخر المسلمين

حتى هنود الهند إبن عمي يفك أرقابها

على بن قريعه عوض سلامٍ إمن اليوم لين

يومٍ تسلمْ به يماني المومنين كتابها

ونيابةٍ عنه وبني سلمان يـام الصاملين

يامرحباً ترحيبةٍ من صدقها يدرى بها

حي الله الي كل ماكبرت على يـامٍ يبين

ماغير ابن وقته ليا عاصت يفك أنشابها

منصى الزهم ومخلص الحجه وسيد العارفين

تزهى به عيون القصيد النُدر ويزها بها

ملينن صلب الحديد الي لغيره ما يلين

والى تحزم للصعيبه بعد ربي جابها

صميدعٍ يقلط على الحكام بالجنب المتين

وهذي يصك أبوابها وهذي يفك أبوابها

ترثت صناديد ال عرجاء يام مروين السنين

موسعت حدان يام وعمدها وأطنابها

وفي ضف ابن نايف سعود الصامل الصلف الرزين

الي عسى تفداه ناسٍ ماتعز اصحابها

والله يحفظ اخوان نوره للبلد درعٍ حصين

عيال منهو وحد الدوله وبشرنا بها

والله يعز الشعب وبلادي ملاذ المومنين

ملجا الضعيف وقرة عيونٍ ترف اهدابها

ويحفظ لنا سلمان ، ومحمد وريث العزوتين

روس الرجال الي لاعزٍ للبلاد إلا بها