كلمات اغنية رد الجميل صالح ال مانعه 2020

يابو حمد والهجوس تقول سقها جلد

وانا لاشفت المديح وشاش راسي علوم

ماقلت كون الصحيح ولاعلي من احد

فرقك على الناس فرق سهيل بين النجوم

ولاهي غريبة الى طاب السنافي حمد

حمد حفيد الشيوخ اللي تحفظ السلوم

وانا لو اني مع اللي بشروك بولد

بشرتك بدرع جنب ومحزم وراس قوم

يابو حمد لاتحملني بحمل ثقيل

الى متى والجمايل جعل عمرك مدي

شرفتني بإهتمامك جعل عمرك طويل

وحملتني حمل جعله مايكل جهدي

احاول بكل ما اوتيت رد الجميل

ويخذلني الحظ والواقع مهوب اجودي

وانا مثل مانت خابر لو يطول الطويل

مابرت ف الرفقة ولا جيت دون وعدي

اقطع لعينا السنافي خطوة الألف ميل

واذبح على شان فرقا كل خيّب فدي

ماهوب يشعف عيوني كل برّاق ليل

بعض البروق ان سرى فيها الدليل يغدي

وان قالو ان الجدي بالذكر كنه سهيل

عيني على سهيل لو اني بجنب الجدي

خريج من تجربة بقعا واخذت الحصيل

حصيلة التجربه للسائلين اشهدي

مريت في ذاكرة لأيام عابر سبيل

ودريت من يوم رافقتك مانيب وحدي

جيتك وانا اونس بصدري غاره ودبك خيل

وبشرت روحي قبل لا اعالمك بسعدي

تخف للضيف وان جات النوايب ثقيل

وتقول للنايبات الى حضرت اركدي

نادر وجنسك الى ماهوب نادر قليل

تبت يد الشعر لو قصر وتبت يدي

يوم اصطفاك الله اختارك عزيز ونبيل

ورفع مقامك بعين الحاكم ولجودي

الله عطاك القبول اللي مايبغي دليل

متربع بين حكام الدوّل وتحدي

لك مني ان دمت حي اني لـ احفظ الجميل

وان مت سارو خواني سيرتي وولدي

جعل الليالي اليا ربي ومرها تميل

تميل بأطرافها على متون الردي