كلمات اغنية يا مرحبا عبدالله الصخابرة 2023

يا مرحبا ترحيبة البدو بالبرق

اللي لهم عامين ما رحبوا به

رحبه اوسطهم ومن فرحته غرق

جفنه بدمع بلل أطراف ثوبه

البرق شرق وهو له صويحب ٍ شرق

وبرَق بصدره بارق ٍ مادروبه

ياللي سرقت النوم والعافية سرق

يازاد قلب اللي هواك وشروبه

ميزة حبيب القلب يطلع لها فرق

وحتى عذاريب الحبيب محبوبه

تغيب ماهمك وأنا ألاحي الورق

ولا تخاف من الجفا والعقوبه

الوصل مرهم كبد وإلا الجفا حرق

والصبر ينفض في غيابك جيوبه

كسرت كل أبواب وصلك من الطرق

وغيرك طرق قلبي ولاني بصوبه

واللي يريد الوصل يامكثر الطرق

لو وقفوا كل العرب في دروبه