كلمات اغنية سنا الهيبة عبدالمجيد عبدالله 2023

برقٍ خطف ع الليل وْ خلّف به شقوق

ساق البشارة وْمن قبِل وَدقها يْطيح

رَحّبت بك ترحيبةٍ سِـقـتها سُوق

فوق السحابه وْصوبك إتدِفّها الريح

رحّبت بك من فوق لَنّ السما فوق

وْقَدرِك بها ياشيخ ما يبغي توضيح

طحنون يا إسمٍ بالأفعال مرموق

وْيا كلمةٍ تغني عن ألفين تصريح

لِك طلِّةٍ تبري بها الهَـمّ و العوق

يعنالها المغبون ويضوي بها مْريح

وْلِك موقفٍ كالسيف من دون لِحقوق

تفصِل به الباطل عن الحق وإتزيح

وْلنِّك كريم الساس من دم و عروق

مثل النخَل جودك بلا مَنّ وْتلميح

راسِخ جذور وشامِخ أمجاد و عذوق

وْمن لابـةٍ ما هَزَّت اركانها الريح

بِك ميـزةٍ تسمو على غيرك فْروق

والشمس لاهَلَّت تُطَفَّى المصابيح

ما كنّك إلاّٰ من سنا الهيـبة مخلوق

وٍمثلك يْابو زايد مَهو بْحاجة مْديح

وإنته أخو محمد سما المجد والذوق

يمناه إذا رَحَّـب وْسيفه اللي مَايْطيح

شوفِك أمان الدار وإن غبت لك شوق

شوق المطر لين إتتـِّباشر به السيح