كلمات اغنية لا تعزموني فالح بن فصلا 2023

جانا مطر ماجذبني صوته وصبه

دام المعاليق من فرقاه يباسي

لا تعزموني على الطلعات والشبه

اخاف لا يحسب اني عايش وناسي

اللي يناظر بعينه كنه مشبه

وهو يكتب اسمي رباعي بين الاقواسي

ليه يتذاكى وانا اذكى منه وألعبه ؟

لعب الورق لا نفح من غرب نسناسي

استغفر الله كاني قلت مااحبه

انا احبه لو اني اكتم احساسي

فارقني وراح والله ربي وربه

غريب انا لو انا عند اهلي وناسي

كل ماتوجعت قالوا اخذ لك حبه

حبة بنادول ومشكلتي ماهي راسي

مشكلتي قلبي وين القى ياعرب طبه

وانا طبيبي عليّه دايما قاسي

مدري امدحه في الغلا ولا اني اسبه

بس اني ادري بحبه طحت متواسي

اليا فقدته كأني مقيد بغبّه

وليا اتصل اتصاله طيّر اعماسي

اصحى لو اني ماوقّت لجله منبه

واضعف وانا اسمعه لو اني قوي باسي

الحب يهدم لو ان القلب من صبه

وش عاد قلبي لو انه الطف من انفاسي

محبوبي اللي ترك قلبي بلا سبه

من جيّته والله اني مااعلن افلاسي

اللي يحسْب الهوى في هالزمن هبه

بيفهم الحب لو اسقيه من كاسي