كلمات اغنية الوجه الحياوي فايز الدوسري 2024

اغايبه كم لي من الشوق ملتاع

راحت بك الدنيا و طال انتظاري

احن لك واشتاق واكن الاوجاع

والحزن من عقبك رفيقً مباري

رحتي وانا ابغى منك تلويحة وداع

ورمح الجفا بين المعاليق فاري

قطّع عروق القلب من بين الاضلاع

ماعاد ينفع به طبيب استشاري

ياحلوه الوجه الحياوي والاطباع

قربك نعيم الروح والبعد هاري

رمشك خجول وسودك الخدره وساع

و نهود صدرك كل نهد انتحاري

والخصر جايع لكن ردوفك شباع

مدري من الظالم ولا هو ب داري

ليا مشت رجلك على يابس القاع

الغيم من فوقه يهل العباري

والورد ينبت فيه من كل الانواع

والطير يصدح لك غناه الكناري

مهرةً عقيدن صيتها ف العرب شاع

و ريميةً تلعب ب روض الخباري

والا عديمً صاده الشيخ فزاع

له مخلبً حده ثعى ف الحباري

ماانتي ب سلعه بين شاري و بياع

من ضامته صدتك شاف العزاري

متى تجين لسكرة الموت نزّاع

لو كان قلبي ب الحزن منك ضاري

ماكنت انا اللي للمقفين تباع

لكن تبعتك كني اللي مثاري

لا ضاع قلبي في محبتك ماضاع

ماكان ملزم كان الامر اختياري

واقول لا اقبلتي علي مرحبا الساع

عقب السهر والبهذله والمساري

جوارحي تبغى وصالك ب الاجماع

وان نسنس النسناس جاب لك طاري

ادهشت لعيونك جماهير الابداع

مافيه بيتً فيك ماهو ب ناري