كلمات اغنية ربيع الشمال فهاد العلي 2019

ربيع الشمال

محريه بالخير يامزون علت وانتشت

ركزت في غرب عرعر وسيقت للشمال

زمجرت ثم ابرقت وارعدت ثم امطرت

حولت من صافي الخير غيثً باعتدال

سيّلت ماغرقت نبتت ماخربت

والفجوج الممحله صارت اعشوبً هيال

من قبل ماخمسة اعوام مرت مانجنت

صارت افجوج الخليزه من اضروب الخيال

كنها جنه على الارض يومن ربعت

والبشر من كل صوبً لها تشد الرحال

حالةً كفت جميع السنين اللي مضت

ونّست كل البشر .. ربّعت كل الحلال

كل تلعه من تلاع الخليزه امتلت

من خيام ومن بيوت الشعر مبها السمال

وصفها مع غيبت الشمس لامن نورت

ساحة ً لاجل الملك جِهّزت للاحتفال

ماحلا جو التعاليل والنار اوقدت

والفحم فوق الحطب زادها بالاشتعال

دلة ومخدار شاي وسوالف هيّضت

خاطر الشاعر وجاب الجديد من المثال

ماحلا شوف المواتر ليا منها سرت

وجهت صوب العقم ماتبي هرج وجدال

منهم اللي لعلبان الركايب حركت

وانتعش عقب التعب ماشكى هم الريال

والكثير اللي على الجندلية وجهت

عند خشان وعلى غربه ومنه وشمال

عقبها للشمريه جميعً شرقت

والكثير اللي غدى فاقدً للاتصال

واخر الموسم جميع الجواني غربت

للمرا وام الفريس وعلى ذيك التلال

كل تلعة مْن شِيوخ الزبادي احتوت

والكما بالحجم رمان والا برتقال

ظرف ساعه كل خيشه كبيره فللت

واحملوها من ثقلها على ظهور الرجال

بين سته كيلو وبين عشرة انمشت

دون سياره على الرجل تقطع لامحال

وان بحرت بعينك العقم اطرافه زمت

ينجلي كل التعب والحمول اللي ثقال

من شهر خمسه وغرة رجب قد نصفت

والبشر تجني من الخير فيها لاتزال

ماحلا ذيك الليالي لفتنا وانجلت

يوم شدوا وارحلوا وانتهت ذيل الليال

وانكسر قلبي بشوف المنازل خلّيت

والعيون استرسلت يوم بيت الشعر شال

والفجوج الخضر عقب النظاره حمّست

وانتهى ريف الخليزه وطوينا الحبال

ياعسى في كل عام الحيا فيها نبت

والجميع يعودها ماشكى ضيق الحوال

تمت ابياتي عساها لشوقي وضحت

والعذر كني مقصر بترتيب المقال