كلمات اغنية العروش الفيصلية فيصل المداريه 2023

صب لي ياللي تسوق الشاذليه

القوافي خيلت وارعد سماها

يوم ابو تركي على ظهر العبيه

قامت الغلبا جبرها واومراها

صفنا واحد سبيع العامريه

لا شعمنا النار مايِجهل سناها

فزعة معزي ويمناه القويه

لابةٍ ماحدٍ يشكك في ولاها

بيعة السبعان ماهي موسميه

مالها تاريخ ويخلص وفاها

كاتبين بنودها في كل هيّه

قبل تشكيل الحكومه واوزراها

لابةٍ يوم الجهل والعنجهيه

تغلب إعداها ولا تِشقر عصاها

باسمها التاريخ يلعب سامريه

واربعين معزي اكثرهم نباها

ماتغيرنا السنين السرمديه

صفحة التاريخ تنبي من قراها

لا عطينا العهد ماخنّا العطيه

الاكارم ماتعوّد في عطاها

دام ضلع طويق باقي له هويه

والعواصف ماتغيّر من هواها

والله إنّا اليوم والصبح وقفيّه

نتباهى في وطنّا ويتباهى

يابلادي واصلي والنار حيّه

وارضك إنّا سترها وإنّا غطاها

دون حدّك مثل حدّ الحضرميه

من ينوشه حدّها ابطى مانساها

عندنا احلام ورؤى مستقبليه

الله يطول حياة اللي بداها

حلمنا خارج حدود الجاذبيه

مادري عنان السماء والا وراها

في مخابينا نشيل الخمس ميّه

من غلا ابن سعود ماهو من غلاها

والثلاث اللي على ركن الهويه

دونها كنق العرب حامي حماها

دونها سلمان سلمان الحميّه

صوتت له وافرحت له يوم جاها

تفتخر في الشعوب اليعربيه

من بدايتها ليا اخر منتهاها

الله الله يالعروش الفيصليه

مستوانا العالمي من مستواها

دولة اللي صورته في الخمس ميه

يسجد التاريخ ويقبل ثراها