كلمات اغنية حبيبة ابوها محمد سلطان 2021

يحميكي يا بنتي من العين محروسة

والله وكبرتي وبقيتي عروسة

يا كريز متنقي يا حتة بسبوسة

يا بنوتة قلبي يا أجمل ننوسة

حبيبة أبوها أهي يا جدعان

وردة وطرحت في البستان

خمسة عليها وع اللي يشوفها

وما يصليش ع النبي غيران

من فرحتي مش لاقي كلام

في جمال كده معقول يا سلام

قمر أربعة عشر يا حبيبتي وحلوِ عليكي أوي الفستان

أمورة بابا عصفورة بيتنا

يا بحر طيابة مغرق دنيتنا

يا أجمل سنيورة يا قمر حتتنا

من يوم ما أنستي وكملت فرحتنا

عندي أميرة في بيتي يا ناس

كوكتيل رقة على إحساس

شعرها غزل بنات والله

وخدها ورد عايز يتباس

بصة في عينها تحلي الكون

قصاد ضحكتها الدنيا تهون

لاء وعليها دلع يا خرابي بتنسيني هموم اليوم

يا هناه ويا سعده اللي هيبقى حبيبك

وهتبقى عروسته ويجي يطلب إيديك

أطلع عين أهله وعينيه عشان أسيبك

سامحيني ما أنا برضو تعبت في تربيتك

أنا بنتي أميرة الأميرات

وجميلة جمال الملكات

حاجة كده من اللي بتسمعوا عنها

في الحواديت وفي الحكايات

يا رب تعيشي في هناء وآمان

وأشوفك أسعد واحدة كمان

واللي بتحلمي بيه يتحقق

وأشوف قلبك دايما فرحان