كلمات اغنية التبر مسفر السندوانة 2022

 التبر

ياهل الذلايل مرجفات الميادين

توقعوا وقع الذلول الخطيره

اللي بها الميدان يزهي من الزين

سبوق روّح خبرها بكل ديره

سحما وبرها فيه للتّبر تبيين

سعره ولونه والمواطي صغيره

مسحوتة الذرعان عكشا عثانين

ربّي حماها ومن ملكها يجيره

تاخذ عقول اللي على الركض ضارين

وتنومس اللي له شهامه وغيره

ان وقفن عالخط توزن موازين

وكل يقلط للسبوق المثيره

وصاروا على التحضير مثل المجانين

وغدى لهم وسط الحضيره حشيره

كل واحد يطالع لجذابة العين

هي قدمت للشوط ولا لغيره

للشوط لوّل قدموا خيرة الهين

سرد الغوارب والمراكب قصيره

فزّت ودزّت سلك لستار فالحين

مثل القطا راحن بارضٍ خضيره

قفن على الميدان مثل الشواهين

ولا الارام ان روّحت مستذيره

نادى المعلق واصبح الراي تخمين

كلٍ يرشح والركايب مغيره

يتهن فيافي مثلما برق زفيّن

وتبعت اثرها واقع اللي مغيره

تقدمن ثنتين مثل القطاتين

عجلات ما خلن وراهن ذخيره

رشح مرشح لوّله دون تامين

ما يدري ان تتبع اثرها خطيره

ذخرهن ابوراشد ليومٍ به تبين

كل سابق ومرغم تعيد الوتيره

ويونا هل القعدان من عقب مرهين

بس المهندس طافهن في مسيره