كلمات اغنية الدانه مسفر السندوانة 2024

الحطب والنار والليل و اطراف النفود

تعطي الشاعر مساحة وجوه تصنعه

اتركوني لين اسافر مع افكاري واعود

رحلة الشاعر مع الفكر رحله ممتعه

تركد الساحه ولا جيت حركت الركود

ارهج الميدان بالشعر لين اولعه

انصف اكرام اللحا واكحل عيون الحسود

وامدح اللي همته للمعالي تدفعه

يا سلام الله على اللي ورث طيب الجدود

نادرٍ يدمي مخاليبه اللي تشبعه

اسم بن مرخان مثل العلم فوق العمود

يرفعه فعله مايحتاج لحدٍ يرفعه

سيرته بين الرياجيل مسك ونفح عود

النعم لامر طاريه لازم تسمعه

لقبوه الصعب والصعب لازادو يزود

يرتكي بالعزم للصعب لين يطوعه

ان رضى مثل السحايب لا حنت بالرعود

وان زعل وجّه للاخصام ضربه موجعه

يدخل الميدان هادي وفي اعصابه برود

المنافس لو يصرح مهوب يزعزعه

يخطف كبار الجوايز ومطلاعه سنود

كل يوم محققٍ يا ثلاثه يا اربعه

تشهد ديار ال ثاني ودار ال سعود

ودار زايد تشهد وكلنا نشهد معه

عزبته مصدر نواميس والعالم شهود

من يدور منبع السبق هذا منبعه

يامحمد سمعتك من صعودٍ في صعود

العرب تنصاك في ضيق ولا في سعه

حاتميٍ في البذل والكرم مالك حدود

دون وجهك تبذل المال ما انتب تجمعه

باسطٍ كفك وجودك تعدا كل جود

اترك اللي دوب يعطي على راس اصبعه

موقعك بين الكواكب لعلك في الوجود

وكل واحد حسب فعله يحدد موقعه

سقت لك من مربط الفكر يانسل الفهود

سابقٍ تطلع بيدها والاول تنزعه

كنها الدانه نهار التحدي والصمود

تُوجت بالرقم الاول على كل جذعه

يوم فزّت مثل حرٍ على الخرب مهدود

اشقرٍ فكوا سبوقه وشالو برقعه

حققت كاس الفخر واذهلت كل الحشود

رقمها في الشوط معروف ما احدٍ يطمعه

ودك الميدان لاجات يفرش بالورود

وودك ان الزعفران بـ وبرها تزرعه