كلمات اغنية لا تبكّون العنود منير البقمي 2023

لا تبكّون العنود ولا تبيحون السريرة

ولا تزيدون الجروح اللي لها فينا مواري

كل ما تنثر دموع الشوق في أوجان الصغيرة

راحت الدنيا عليّ أضيق من عيون الكناري

إزهمت بإسمي وضمت ثوبي وقامت تديره

وهمهمت بعتابها اللي ما يروح لشخص غيري

كأنها ترثي الغياب اللي ما حددنا مصيره

وكأنها تقرا حديث الوصل من كتب البخاري

علموها لا تضايق يا عسى في الأمر خيره

كان طال العمر غرد بإسمها دوح القماري

وسامحيني كان مت ورحلة الدنيا قصيرة

قبلة الوداع تكفيني وقبري في انتظاري

والجماعة والمعارف والجماهير الغفيرة

ما يعوضون بمحل ابوك والفرقه جباري

وإن توفت عقبي وشر المنايا طار طيره

ادفنوها في يمنيني واكرموها عن يساري

أدري إن عقب الحياة الفانية ما فيه جيره

لكن الشوق يحداني للهبوط الإضطراري

جل شان مقدّيٍ عين البصير من البصيرة

حيٍّ أكرمني وجاني بالعنود وطاب كاري

يوم حققها الرجاء سميتها بإسم الأميره

وبإسم وضحىً من خيار الطرش في سفن الصحاري

طاري البل شره عقيل ونسى يربط بعيره

ضاع لونه مع عتيم الظلم في سود الغداري

في سموم القيض والكنه وفي شمس الظهيرة

هقوتي في الطيبين أشوفها عازل حراري

زال محزمنا سند حي وعلى وجه الجزيرة

ليش أنصيها العتيبي والهذيلي والمطاري

من تحزم بالكلاش وبالطوال وبالذخيرة

ما تلفت في السيوف وفي الجنابي والشباري

كل ما طروا قيا سلم ع شيخه وأميره

سند إبن ذعار إبن سرحان مزبان الطواري

والله ونعم الفعل والمرجلة يا أخو منيره

موقفه كأنه زعيم العرب في ذات الصواري

جاه وجهه فك بابٍ تلحق النوبه خفيره

وجود يمناه السحاب مشرع بطون الخباري

كوكبه ما هو بفي حساب المزارع بن عميرة

في مدار الكون متبين ماعنه البحث جاري

ديرةٍ ما هو بفيها والله إن ما هي بديره

الطريق يمرها وترده اللوحه جباري

الرجل ينطق لسانه حسب ما يملي ضميره

والحقايق فرقت ما بين الأصلي والتجاري

يا نذير الفتنة المعروف ما ينكر بشيره

أملوا بطون الدلال وفضوا حلوق الغواري

الكفو لا مدح إبن عمه يعرف إنه خشيره

وراس أبو زيد الطويل أكبر من أفواه الظواري

يا سند راعي قيا مديح شعري كثر خيره

خلد شيوخ الفعول وهمّش الأمر الوزاري

من ملك رفقة خويٍ نور وجهه من ضميره

لا يغبط أهل البنوك الراجحي ولّا العقاري