كلمات اغنية يا هل المملكة هاجر نعمان 2025

يا هل المملكة مني عليكم سلام

لوّح القلب بالتسليم قبل الكفوف

من ثرى الجوف إلى نجران مني سلام

ومن رصيف البحر الأحمر .. إلين الهفوف

يطوي الخايع المقفار .. طي الخيام

ويسحب الذيل مثل العيطموس العيوف

حاميٍ كنْه سيفٍ في نهار العَسام

وحاليٍ كنْه ترحيب البدو بالضيوف

كلما رفرف الأخضر يعم السلام

والسحايب تصب الما .. وتضحك هنوف

أشهد انه على القمة فـ راس السنام

السلاطين من قدره تحيّي وقوف

تل قلبي ليا رفرف .. عليه الحسام

المشاعر تدق الروح دق الدفوف

وتدبك الخيل في سمعي .. ويشرق عتام

من شموخٍ يشوف الشمس تحت الكتوف

ليتني في عوالي نجد ريشة حمام

وليتني نسمة فـ وادي حنيفة تطوف

لا تذكرت لي فيها خوال وعمام

يا صروف الدَّهَر ما عاد اشوفِك صروف

ويا جبال الجنوب اللي تشق الغمام

بلغي مهجة الغيمة تحن وتروف

أرسليها على قوم الحجاز الكرام

للحجازي على كل الشعوب مْعروف

ناشدي عن هل العوجا يطول الكلام

انشد الخيل عنهم والقنا والسيوف

الله اللي جعلهم للبلايا كَعام

ومن قديم الليالي مزبنٍ للضعوف

من تعزوا بهم في ذمتي ما يضام

عام تسعين يغني عن كثير الحلوف

يا هل المملكة .. مافي غلاكم ملام

جعل عينن ما تعشق شوفكم ما تشوف