كلمات اغنية بندول الجوكر 2024

مفهوم لو سال لعابك

خصوصا واحنا في غابة

الناس فكرانا دوسنا زرار بقينا نضاف ..غلابة

فاكرينه فيلم بطله طلع من القاع وعاش في خط..

فاكرين الضلمة رحلة الناس بتروحها صد رد …

بتمرجح بيني وبيني بندول

تايه في راسي بتخبط علي طول

كلمت نفسي تناديلي المسئول

قالتلي مشغول

في كلاب في راسي قعدت سنين بطفح فيها

بس هي ليه ماسكتتش أما فهمت الحقيقة ؟!

نفسي أوقف الزمن دقيقة

لكن ماتسيئش الفهم .. كل ده وأنا في نعمة مش في ضيقة

لكن خلاص معادش جنب الصح نجمة

كل حاجة بتبقي أصعب اما بنكبر

كل حاجة بتبقي أرخص اما بتكتر

بنعوزها واما تحضر..

نعيد تفكير .. هو إحنا بنكسب ولا بنخسر !

تبدأ تفكر هل فعلا في شئ مهم !

مستني حد يقول فركش .. تطلع حياتك اصلا فيلم

أو تجربة من أجل العلم

أو حتي تطلع حلم

لا حلم ايه ده انت في كابوس مستني حد يقولك بم

فوق كتافك هم

يومك كله غم

زي ما تكون الدنيا واخدة منك جنب

تصحى تشوف هتشيل ولا تشيل الذنب

سباق وآخره عضمة .. ليه انت كلب !!

ومحدش هيشيل عنك .. شيل انت

عالم محاكاه .. مفيش أشخاص .. في انت

مبقاش سؤال .. بقيت تتنفس ليه انت !!

ولإمتي !!

عجيبة تقلبات وجهات نظر الواحد مننا

بفتكر انا المراهق أقول: أكيد في الواد ده إن

كإننا إتشقلبنا مش إتغيرنا سنة سنة

نمنا عيال صحينا كبرنا

نجري الدنيا تجري أسرع

الناس مكن في مصنع

طريقنا مهلك .. مطلع ف مطلع

مش بعرف أمنع نفسي إني أطمع

هاتوا اليقين وانا آجي عند الشك وأقطع

كوني عارف إن العيشة لحظة وقافش فيها مؤلم

انا ليه مش عارف أسيب مع إني حاسس نفسي مؤمن

لسه عايز أملك الدنيا .. وده شيء مقلق

بس بقى لبيتي مش عشاني.. هل ده خير؟! ممكن

في العشرينات تحيا الصحاب .. العيلة قدمت

في التلاتينات راحوا الصحاب، والعيلة فضلت

سنين راحت مش راجعة، وللزمن ديون وكترت

والعيشة من أصعب ل أصعب ل أصعب .. بجملة

وأدينا في الدنيا بنقضي ليلتين

بدأنا نفهمها في آخر ساعتين

يادوبك نسدد الدين

السكة مش سهلة … وقصدي الأتنين

بس احنا على ميعادنا

بنحاول نبقى أحسن من ذاتنا

عمر لوم غيرنا ما فادنا

بنحاول مانتوهش في العتمة