كلمات اغنية نسبة الوعي الوليد ال عامر 2021

ليه يا ليل ما تسري وانا اقول رح عني وراك

شكلك الليله معزم اتجيني ابدون مقدمه

والله انك على كبدي ليا جيتني تسحب خطاك

تمسي الدار رغم انوارها في عيوني مظلمه

والطواري تهكرب من بعضها بكثر الاحتكاك

تحرق اعصاب راعيها وتنخر عظام الجمجمه

همت في واديٍ قام يحداني على درب الهلاك

واديٍ ماهو بـ وادي حنيفه ولا واد الرمه

تالي الوقت يا قلبي تغيرت مدري وش بلاك

راحتك مالها طاري وصارت عليك محرمه

كن خلف الظلوع حروب فكريه وفضوى حراك

وانت عنصر محايد ما انت واقف مع اي منظمه

الليالي تدور وكل دوره لها عقد اشتراك

والمشاكل بعضها ما تحله بصفقه مبرمه

عزة النفس لو مهيب تغنيك ترفع مستواك

عند رب البشر خيرٍ عظيم وغناه ومكرمه

عان ربي عطا لـ الراك قيمه وعزه بالسواك

لا تهاون بعود الراك والا بعد عود اسلمه

والعرب بين جعلك ما تحيا وحي الله نباك

ما تميزهم الا يوم تذكر صفات مسيلمه

نسبة الوعي لا زادت تراها تبي تبحث خفاك

لا تحسب انها ثروه ومكسب شهايد واوسمه

كل ما زاد عرفك فـ الزمن جاك شكه وارتباك

كن قدمك ملفات اتهام وقضايا محكمه

لو بغيت العلوم تمر عيا يمررها ذكاك

كل كلمه لها تفسير عندك وشرح وترجمه

عادي تجامل الدنيا وتضحك قبل تضحك علاك

بس مهوب عاد تصير بين الرياجيل رخمه

لا تحرا متى يطبخ غداك ومتى ينجض عشاك

كان لـ اهل العزايم ملحمه لـ المقاصب ملحمه

ان تقدمت واجد يمكن الناس ما تلحق مداك

لين تالي تحس انك تعيش بحياةٍ مؤلمه

لو تراجع عشان تعيش مثلك مثل بعض اخوياك

احسن من الحياه لحالك بمرحله متقدمه

رجعوني لـ الايام الخوالي وخلوني هناك

ودي اقضي حياتي بين رمحه وبين المردمه