كلمات اغنية وداع السجين الوليد ال عامر 2024

من البارحه وانا انتظر حزة المنهاج

لو الذكريات تحاصر القلب وتدكه

اشوف المشاعر كنها زحمة الحجاج

واقول المشاعر قدست بس في مكه ..!

عشان النديم اللي عطيته وانا محتاج

وعمرت حبه وسط قلبي واخذ صكه

احنه من الزله ومن هرجة الهراج

وابكي عيون اللي يقولون لي بكه

ولاهوب شرط البعد يطفي الغلا وهاج

ابن عون كان مولع بـ طيره وفكه

يا شين الوصال اللي يجي من وراه ازعاج

خصوصاً مع اللي .. يفتح الباب ويصكه

وانا اهون علي يقفل الباب بـ المزلاج

ولا يتركه مردود .. في سده بلكه

فراقٍ غلانا فيه اساسي وطلق حجاج

ولا وصلٍ يجلس غلانا على الدكه

لازاد العتب قل الغلا حسب الاستنتاج

لو ان الغلا مثل السمن داخل العكه

عزمت وقطعت الراي حين الصباح انباج

وحصنت قلبي يوم وريته السكه

مدام المرض تستخرج الناس منه اعلاج

ابا استخرج الراحه من الضيق والتكه

توادعت " انا وياه " منعاً لكل احراج ..!

وحفظاً لـ ماء الوجه والخوف والشكه

وداع السجين اللي بعد وصله امر افراج

توادع مع اصحابه .. وقلبه يبى الفكه