كلمات اغنية ياظلام الليل الوليد ال عامر 2024

العفيف اللي ترجّل عن جواده وش بقاله

غير بيتن عنده الفاهي لياا عرّض تنَبّه

شاعرٍ لو ينكر انّه عاشقك حتى الثماله

تفضحه بعض القصايد والرسوم المشلهبّه

هو عيوف خاطره طايب و وقته ماصفاله

عيبه الماخوذ حساس ولبس للوقت جبّه

ياظلام الليل وش عندك من أبواب العداله

وانته ابعد ماتكون من العداله والمحبّه

تحسب ان قلوبنا مثل الصحون ام الفواله

وتحسب ان ضلوعنا مثل الحطب حتى تشبه

ما بقاموسك محلٍّ للوفى ولّا الجماله

فيك حتى الطير مايلقى ليا من جاع حبّه

ليه تستنزف مشاعرنا ومن باب الجهاله

وانت ما عندك عليناا يا ظلام الليل سبّه

وش تبي فاللي مشَاك وتحسب انه كان داله

كم سراك وكم سبح في طيّتك تسعين غبّه

في يمينه كن مسباحه غدى خيرة عياله

في عيونه ماهو بشيٍ ليا هوجس لَعبّه

وكم سهربك راس ماله غترته مدري عقاله

مع شموخن يكمن الإيثار في قشره ولبّه

كم تمثنا جوك البارد وهو جالس لحاله

بليلةٍ فيهاا القمر وايق وذعذاعك يهبّه

وكم لقاله فيك رجمن يتعب الراقي مطاله

وارتقااه وطااح من عينه كثير من الاحبه

وانت ياللي كنك اصحاب الفخامه والجلاله

ادري ان شوفك حرام وغيبتي لك مستحَبه

تدري ان مغليك غاب وراح من طيبه وفاله

ليه تنشد عقب ذاك الوقت يوم الريع ذبه

زرفلَن هجنه من البارح على درب ارتحاله

مطوّحن راعيّها بالصوت مافيها مغَبّه

قد عطاك من الوفى اللي يصطفق جاله بجاله

لو تلاقي ربعه بـ ذالوقت والله ما تكبّه

بس ذاك اول قبل يدرع يقينه باحتماله

يوم هو والله غشيم ويوم للأيام خبّه

ليه تنشد يوم صارت حالته فالوقت حاله

جيّتك لأمن بغيت الصدق والله ما تشبه

غير في عودٍ براه الوقت وأسرف في محاله

ما تفيده مزنتن من مطلع القبله تصبّه

كنت لك فارس ومن قومٍ عمامه هم خواله

ممتطي لك صهوة اللي ما يوصفّها المشبّه

من بناات الريح وأطيب ما يجيبنّ السلاله

ماا يعرّضهاا على السوّام لو سومه ..كسبّه

وطحت من دونك صويب وطيحتي فيها شكاله

طحت والعدوان حولي وانت نبّ العلم نبّه

المحزّم ماعليه من الهلايم والحثالة

تدري انه ما يدقّق فالمديح وفالمسبَّه

ويش ابي بك يوم طبت ابشرك عدّت سهاله

وانت يوم الحاال ينزف باخلٍ تعطيه طبه

لا تسااوم مثل هذا في وفااه وراس ماله

صعب تلقالك جواب ويمكن اسهل تستتبه