كلمات اغنية الجمال السعودي سلطان بن مريع 2024

يستحق الغرام ويستحق المحبه

واحد ٍ ماخذ ٍ قلبي وزوّد حنيني

في كلامه وذوقه والحلا مايشبّه

مرضي ٍ والديه ومرضي ٍ والديني

في جنوب الوطن رابي وفيها مربه

راعي النظره اللي تذبح العاشقيني

العيون النواعس كن عليها مطبه

من كلاها دخل في عالم التايهيني

وكل مالاعب النسناس شعره وهبه

مهرة ٍ خلفها قوم ٍ لها محتيميني

الجمال الطبيعي ماخذه من مصبه

لابسات العبيّ وناقشات اليديني

السنع والنشامه ميزة ً مستحبه

في بنات السعوديه عمى الحاسديني

حشمة ٍ عارفنها كل من خاف ربه

والحيا اللي يجمّل وجنة المستحيني

فيهم الثقل ماراحو ورى كل هبه

يعرفون الرخيص ويعرفون الثميني

زينهم زين من ربي ولحدٍ لعبه

ماهو صناعة التجميل يامسلميني

في بلادي مقر الزين وخلاص لبه

ساجيات العيون ورقة الياسميني

ماوجِد باليمن والشام ماينوجد به

الجمال السعودي الأول بكل حيني