كلمات اغنية أهل المكاشيت صالح الزهيري 2020

 أهل المكاشيت 

جعل ذعذاع الهبايب لاذعذع واستدار

يستدير بـ مقفيات المخايل و القنوف

تجتمع مثل المواليف عقب الانتظار

وتنثني مثل المطاليق في وجيه الظروف

في مطالعها تمادي ونشوه وانتشار

وفي مثانيها طرف ليل ومصادم كتوف

كن دجاها لاتناثر على وجه النهار

الجديل اللي يتناثرعلى لبة هنوف

تاخذ آسبوعين نفس الغزاره والمسار

المطر مثل المطر والوبل كبر الكفوف

سيلها يزمي مع الضلع ويشق الزبار

فيه من فوضى الطواري ومن كسر الشفوف

مايلايم جرفه الا البذيره (والخضار)

لاستوى مثل الصور واعتدل مثل الصفوف

آتشكل كل روضه وتنبت كل دار

واتحقق كل غايه ويمشون الوقوف

يستوي في ذروها للبدو حسن الجوار

والشديد وشبة الضو وحقوق الضيوف

ويستوي لـ اهل الطرب والولع نقل الحرار

ويستوي لـ اهل المكاشيت تعليق الخروووف