كلمات اغنية حـزة عـصّيـر عمر بن عضيب 2021

الحزة اللي تورق الغصن بالطير

غصن تعرى من السنين العجافي

منها يتحشّد صدري و ودي أسير

وإن سرت ودي أسرد من القوافي

مادامها تغرد فأنا أفر وأغير

وإليا سكنت لليل عودت لافي

إترقق إحساسي مثل طفل صغير

وأدلي لمن في صحبتي باعترافي

أفري له الوجدان من غير تشفير

ما عاد في ذيك الحنايا خوافي

ياما بنيت أحلام وأضيق وأثير

أسبابها لو إنها من خلافي

وأقلب وجيه على كبوتي تشير

وكم بينت لي كبوتي من سنافي

والقشة اللي انقصم منها بعير

هذي مواريها بدت كلها في

الحالي أجدل رجلي وحزة عصير

وحزن مكين صار ثالث الأثافي

واليا انجرف لون الدجا بحسن تدبير

وغشّى جبين الشمس زاد إنجرافي

في عز الله إني وقتها ماني بخير

ما فيه شيء من الهقاوي يشافي

زاهد من الدنيا مثل راهب الدير

ما مر في دربي من الشوك كافي

وأما الأسامي اللي غبت دون تبرير

تدفن بقاياها رمال السوافي

ببقى على الذكرى ولوم المقادير

حتى الطلل ببطي عليه الوقافي

وأندب من العبرة دموع لو تذير

تهز الكتوف وتاخذ الحق وافي

هذا أنا لو خانني كل تعبير

عاصي على كل الحروف اكتشافي

لأنّي الحزين اللي الحكي فيه بيحير

وإن حلت الفرحة يحين إنصرافي