كلمات اغنية المبسم المعسول فايز الدوسري 2024

تمايل بعودك يا الغضي وانثر المجدول

على متنك الفح في جدايلك وأفهقها

تولعت بك وأنا عليك أشتحن وأقول

مقد شفت غيداً خصرها مثل عاتقها

تمادى خيالي فيك واسهبت بالمرسول

على نور وجهك غيمتي لاح بارقها

ترفق علي شوي في المبسم المعسول

لا تنتل عروق القلب بإيدك وتسرقها

أنا أضيع بين عيونك وخصرك المفتول

مثل ما تضيع السالفة، يوم أبى أنطقها

يا وجهً بياضه مثل نور القمر مجمول

عليه العهود من المحبة موثقها

عذابي من عيونك ومن رمشك المسلول

ومن التينتين اللي سنا الشوق محرقها

شفاياك فيها من الجمر والعسل واللول

أنا ودي أقرب توتها وأتذوقها

لا تبخل عليّ بشوفتك يا فريع الطول

مواعيد حبك قمت أحسب دقايقها

غزتني طيوفك غزوة اللي سلب له شول

عديمً عليه القوم تلحم بنادقها

سهوم المحبة توجع الخاطر المذهول

رمتني وأنا اللي في هوى الحب سايقها

مدام الهوى بابه مشرع بدون قفول

أبى أعوم في بحور الهواجيس وأطرقها

ولا يشغلك هرج الخلايق وزحم الضول

أنا معك لين الروح ترجع لخالقها