كلمات اغنية اهل القنص فهاد العلي 2020

يا اهل القنص جالكم للصيد ماريه

ايلول حل وسموم القيض متلاشي

اول تباشير جانا علم ديميه

غرب الحزم والبكر لو نوها اطشاشي

واستبشرت نفس للمقناص شفقيه

تبي خلات الفضا عن قصر واعشاشي

ودي بسجه بوسط الرمث عصريه

اترك زحام المدينه وانزل ادشاشي

وابني خيامي وبيت الشعر في فيه

واسامر النجم مابغى النور وفلاشي

عقب اختيار المكان وصحبةً حيه

ارجال مافيهم النمام والواشي

والرفقه الطيبه تدفعك للجيه

لاصرت كفوً ووجهك دوم بشّاشي

ماناموا اليا الضحى ماهم ضحاويه

مادورا عن لهيب الشمس الاحواشي

اصدورهم مثل ديرتهم شماليه

مايجلون الشغل يمشون بالكاشي

حلاتها لاقعدت بوقت فجريه

وادلالك امصطره واوجار وافراشي

ثمً سعرت الغضى تحت الحساويه

عقب الصلاه وسمانا غيمها ناشي

والبن حماسته ناسً شقرديه

ماهم من اللي مشو في خاش خرباشي

على قدوع ً من اخلاص ً قصيميه

في مجلسً مالفاه الهيس واللاشي

وليا تكايفت وجهها على النيه

واخذ الجنوب ويمين وشرق مطراشي

هذا مريعي واشوف يسار قمريه

نبغى غدانا ترى شفقين وعطاشي

معنا بواريد لجل الصيد منقيه

محفوظه ازنادها مكفول ما اناشي

سوبر بنلي من المصنع ايطاليه

تضمن هدفها مهي كشخه على الماشي

قبل الظهر صيدنا شارف على الميه

صفّار وامريعي وقمري هوى الجاشي

هذي حلات العمر .. والعمر عاريه

اغنم لياليه قبل اتلف باقماشي