كلمات اغنية الجادل فيصل المداريه 2021

الجادل اللي حبها سيطر على القلب الحزين

عجزت لا قاوم مفارقها واقاوم غيّها

سلمتها قلبً منول عن عزومه مايلين

لو دورت سود الليالي فالعروق رحيّها

لين استباحت راحته واستظهرت سرً دفين

واقفت وخلتني على جال القليب وطيّها

مع ان ماجاها خطا مني وانا عذري سمين

لكن حفظت الها غلاها لين جوّد كيّها

وادرا على السمعه من اللي للقفيا جاهزين

يبطون مايلقون مني ماتقول فميّها

وانا عتبرها اول غلا واخر غلا علمً يقين

عسى مزون الغيث تسقيها وتسقي حيّها

بنت الشيوخ اللي تضد القوم بالجنب المتين

في ضفهم تستانس العراء ويكبر نيّها

يبقى غلاها في خفوقً بالغلا مايستهين

ام الخدود اللي شعاع الشمس يشبه ضيّها

الله يسامحها على ماسوته هاك السنين

في ديرتن خطرً يموت من الضما طرقيّها

وانا على ذيك الليال يسوقني شوق وحنين

احيان اقول ان الليالي ذيك ماجاء زيّها

ذيك الليال الطيبات اللي تسر الناظرين

اللي على الغصن الخضر يلعب طرب قمريّها

معاد باقي لي سواء ذكرى فراق الراحلين

والرحلين فراقهم صعبً علي انسيّها

حتى ولو كابرت وابديت السعاده مرتين

تدفعني الذكرى ليا نسنس هواء غربيّها