كلمات اغنية طور في ساقية ليل المحمدي 2023

في الوقت اللي إنت بتقرا فيه جوابي

بنهي حياتي وأنا في بداية شبابي

من غير ما تحتار أو تفكر إيه أسبابي

كل اللي فيها إني زهقت من عذابي

كل يوم طور في ساقية بيجري ورا حبة ملاليم

لاغي حلمه ناسي هدفه كل همه مليم

لما قال الآه في مرة قالوا له إنت مش سليم

فإنت تمشي ونجيب غيرك يستلم قسم الجحيم

شكلك مش ملائم لينا هنا في سوق العبيد

محتاجين عبد خبرة خمس سنين وإنت جديد

هتاخذ وقت كثير معانا علشان تتأقلم

تتعلم وتقول حاضر تمام يا فندم

فبقيت عواطلي في شلة بايظه بنسهر للفجر ع القهوة

حتى الحلم بفلوس ياما عشان أسعى له محتاج لثروة

فبقيت عالة على أهلي بس والله غصب عني

كل يوم بحاول أقف بس الأحداث بتوقعني

التليفون بيرن برد حبيبتي تقول سامحني

إستنيتك ياما بس إنت كده بتعنسني

أهلي شكوا فيّ علشان برفض أي عريس

فأنا مضطرة أسيبك إنت وحظك التعيس

بص لي إبليس وقال لي عشان ننساها لازم نشرب

أربع للبق الأخير فكك من الواقع ده واهرب

فشربت عشان أنساها مشيت بهلوس بإسمها

ليه باعتني فأكثر وقت احتاجت فيه حضنها

مشيت في نص الليل جسد ما عادش جواه روح

بقايا إنسان مطفي ملامحه باهته من الجروح

مش عارف رايح فين سايبني أروح مكان ما أروح

بقى الموت بالنسبة لي هو ده أكبر طموح

مش عايزك تستغربني أنا في زيي كثير

يمكن إحنا الأغلبية العظمى المدفونة بضمير

هتشوف ع الوش مننا ناس مش باين عليها

لكن جواها نار بتاكل كل حتة فيها

أخذوا لنا صورة بنضحك فيها قالوا مبسوطين

إحنا بنضحك آه لكن من كثر ما موجوعين

قولتوا إننا جيل فاشل عشتوا دور المظلومين

والله ده إحنا جينا لاقينا جناحاتنا مقصوصين

المنبه بيرن بصحى استغربت بصراحة

إزاي وأنا واخذ أجازة من الدنيا واستراحة

أتاريني اتلخبط وأخذت برشام المنوم

يمكن دي فرصة ثانية هطلع بيها من المتاهة

رميت برشامة الإستراحة وقلت أنا هفوق

هركز على أحلامي بس وإسمي هيبقى فوق

إضحك يا اللي بتكتئب والدنيا بكرة هتحلو

صمم كمل وعافر وإنت تنجح عافية زوق

الدنيا دايما هتسيب لك في الرحلة فرصة ثانية

إستغلها وحاول تعيشها بعين راضية

هتشوفها سودا هتلاقي السواد بيملا الجو

هتشوفها حلوة وتضحك لها تضحك لك في ثانية