كلمات اغنية الجمال الحقيقي ماجد خضير 2024

يالله بغيث ٍتسوق النود هماله

يضفي على نجد قاصيها ودانيها

ويسيل واد الرشا من جاله لجاله

حتى عروق العشوب الشهب يحييها

والبل يوسع خواطرها وتبراله

وتزين خطر هل الناقة ويرضيها

وعشاقة البر والمكشات ورجاله

تجهز جيوبها عن بكرة ابيها

واللي يشيل الهموم وضايقٍ باله

يشغل الجيب والديرة يخليها

يحذف شماغه على يمناه وعقاله

ويبعد عن الديرة اللي ساكنٍ فيها

ويقفل الهاتف الجوال وارساله

ويروح في روضةٍ ربي مسويها

يسج فيها القدم ويزيّن أحواله

ويرتب افكار شعره في مثانيها

ويجر فيها طواريقه ومواله

ويطوح الصوت وبيوته يغنيها

فـ جادلٍ تسلب الألباب مختاله

اللي من زين فيها ما يكفيها

العنق عنقٍ الظبي والعين قتاله

والبطن ضامر تقول الجوع طاويها

والخصر منا ومنا عروة بيالة

والردف حتى العباية ماتغطيها

وان طبت الحفل كل الناس بالصالة

اللي يوقف لها واللي يحييها

هيبة حضور الجمال اللي على حاله

غير الجمال الطبيعي مايجريها