كلمات اغنية حاليا بالاسواق طارق الشيخ 2009

عالم رايحه وعالم جايه وعالم دايره في وسط السوق

ونفوس والله ضايعه وضاله وناس حريفه اكل حقوق

اللي يحبك علشان عره واللي كأنه ماسكلك ذله

واللي بيغدر يا ساتر استر لو كان رزقك على مخلوق

ولا الصاحب اللي مالوش لازمه اللي يسيبك وقت الازمه

مهما اتهرب بكره يجرب ما هو من نفس الكاس هيدوق

غيره وجرح وذل يا دنيا ده اللي في الاسواق

ناس بتخونك وتزيد جرحك وبتفتحلك جرح قديم

وتخون عيشك وتخون ملحك وانت معاهم كنت كريم

كنت فاكرهم والله ملايكه لكن دول طلعوا عرايجه

يخطفوا حبك وتلاقي قلبك مبقاش فيه ولا جزء سليم

تدي حنان يترد قساوه تعمل خير يترد عداوه

ناس مش هما زي الغومه منهم يا رحمن يا رحيم

غيره وجرح وذل يا دنيا ده اللي في الاسواق

ناس مخنوقه وناس متضايقه

وناس مش طايقه لبعض كلام

ناس مرتاحه وفايقه ورايقه ناس تتحايل على الايام

ناس جواها الشر بيرعى خلوا الحب مجرد سلعه

عايز حب وشوق وموده ممكن بس هتدفع كام

حتى الحب خلاص راح زمنه بقى ليه سعره كله بثمنه

تدفع اكتر تتحب اكتر والمساله مش عايزه كلام

غيره وجرح وذل يا دنيا ده اللي في الاسواق

خلق بتسرق عمرك سرقه وعلى القسوة ميتوصوش

خيرا تعمل شرا تلقى ناس بصراحه ما يستاهلوش

ياخدوا حنانك ويزيدوا همك عايزين بس يمصوا في دمك

تفضل تدي وتدي وتدي يفضلوا ياخدوا ومبيدوش

يدخلوا بيتك يكشفوا وساترك

يطلعوا بره يجيبوا في سيرتك

ظهرك ظهرك وشك وشك دول على السري ما يتامنوش

غيره وجرح وذل يا دنيا ده اللي في الاسواق

احنا يا دنيا تعبنا يا دنيا واتعذبنا شهور وسنين

ياما عاشرنا وعشنا وشوفنا بني ادمين مش بني ادمين

شوفنا اللي بيتباهى بجهله

واللي ملوش خير حتى في اهله

واللي بيحرم نفسه يا دنيا علشان يسعد ناس تانين

واللي محدش ابدا همه واللي بينكر لحمه ودمه

واللي مزعل منه ابوه وامه وعليه غضبوا ليوم الدين

غيره وجرح وذل يا دنيا ده اللي في الاسواق