كلمات اغنية بخطرلي أشتقلك فرج سليمان 2023

بخطرلي أشتقلك بكنّس الفكرة

بجمع المكسور من كاسة الذكرى

كأنّي بلمس خدّك وبكفّي تتجمّع

من حِدّة القصّة صورنا تلمع

تجرح خطوط الحظ ينزف دفا الرغبة

ويسيل من التفاصيل ندى الرهبة

بتأكّد من الرّف إذا بعده بتحمّل

مراطبين الصمت وصحون تتأمّل

ترجع على السُفرة تحمل أكل دافي

وزيت السنة يبلل خبز حافي

بحكي تعي نرجع بسمع صوتي جاف

من شمس الظهر لون صوتي خاف

مثل التمر والتين، صوتي كفن سكّر

عنب الأمل بالتيه يتخمّر

لو ترجعي بسمة، تذوب ويحلا الشاي

لو ترجعي نسمة ورا البرداي